Bráðskemmtileg og jólaleg fjölskyldusýning. Kjörin fyrir börn á aldrinum 4 - 9 ára. Aðgangur er ókeypis og öll hjartanlega velkomin á meðan húsrúm leyfir.

Trúðavinkonurnar Silly Suzy og Momo eru jólabörn og hlakka mikið til hátíðarinnar. Silly Suzy hefur aldrei dvalið á Íslandi áður um jólin - hún er frá Clown Town í Bandaríkjunum - svo Momo vinkona hennar kennir henni hvernig skemmtilegast sé að njóta saman aðventunnar á Íslandi.

Þær vinkonur bregða sér saman á skautasvell og búa til snjókall, skreyta allt hátt og lágt og baka piparkökur. Allt með hæfilegri blöndu af trúðalátum og prakkarastrikum, loftfimleikum og alveg geggjuðum jólalögum sem koma okkur öllum í sannkallað jólaskap.

Sýningin er á íslensku og ensku og stendur yfir í um hálftíma. Frábær fjölskylduskemmtun með áherslu á börn á aldrinum 4 til 9 ára.
Fram koma Lauren Charnow og Alice Demurtas.

🎄🎄

Aðgangur er ókeypis og öll velkomin á meðan húsrúm leyfir.

Viðburðurinn er styrktur af lista- og menningarráði Kópavogsbæjar.