Kvintettinn Kalais heldur tónleika í Salnum sunnudaginn 12. maí klukkan 13:30.

Kvintettinn er skipaður hljóðfæraleikurum úr Sinfóníuhljómsveit Íslands, þeim Martial Nardeau flautuleikara, Matthíasi Nardeau óbóleikara, Grími Helgasyni klarínettleikara, Emil Friðfinnssyni hornleikara og Brjáni Ingasyni fagottleikara. Þeir félagarnir munu leika tvö verk eftir flautuleikara hópsins. Annað verkið nefnist Divertissement eða Gletta, en hitt Missir og verður það frumflutt á þessum tónleikum.

Martial lætur af störfum í Sinfóníuhljómsveitinni í haust og með þessum tónleikum er hann að kveðja þessa meðleikara sína til margra ára. Verkin eru hugleiðingar hans og minningar í tónum um árin í hljómsveitinni.

Tónleikarnir eru rúmlega hálftíma langir og án hlés. Aðgangur er ókeypis og öll hjartanlega velkomin á meðan húsrúm leyfir.
Kópavogsbær og Menningarsjóður FÍH styrkja tónleikana.