Hafnarborg – menningar- og listamiðstöð Hafnarfjarðar var stofnuð árið 1983 og varð um leið aðsetur listaverkasafns Hafnarfjarðarbæjar. Sýningardagskrá safnsins er fjölbreytt en að jafnaði eru haldnar 8-10 myndlistarsýningar á ári, þar sem finna má verk er spanna íslenska listasögu allt frá þjóðargersemum frumkvöðlanna til tilraunakenndra verka listamanna samtímans.

Fyrirlestrar og málþing í tengslum við sýningar safnsins eru fastur liður í dagskránni auk þess sem áhersla er lögð á að bjóða upp á samtal gesta við listamenn og sýningarstjóra og stuðla þannig að áhugaverðri upplifun af sýningum, sem og aukinni þekkingu á safneign og starfsemi stofnunarinnar. Þá eru listasmiðjur og leiðsagnir fyrir börn einnig meðal reglulegra viðburða safnsins.

Loks er boðið upp á fjölda tónleika allan ársins hring, svo sem hina vinsælu hádegistónleika og Síðdegistóna yfir vetrartímann, auk samtímatónleikaraðarinnar Hljóðana að vori og hausti og Sönghátíðar í Hafnarborg á sumrin.