Skip to main content

Aðventan á Borgarsögusafni


Árbæjarsafn í jólabúning en engin skipulögð jóladagskrá verður í ár

Árbæjarsafn er komið í jólabúning. Gestir eru hvattir til að heimsækja safnið á aðventunni og njóta þess að ganga um svæðið og kíkja inn í fallega skreytt safnhúsin og upplifa þannig jólaanda liðinna tíða. Jólatréð er komið á torgið og safnhúsin Lækjargata og Suðurgata gefa innsýn í jólahald í Reykjavík í gamla daga. Vegna sóttvarnatakmarkanna verður engin skipulögð jóladagskrá í ár en boðið er upp á ratleik um safnsvæðið fyrir fjölskyldur. Safnhúsin eru opin alla daga 13-17 en safnsvæðið sjálft er alltaf opið gestum og gangandi.

Safnfræðsluteymið tekur daglega á móti skólahópum í jólafræðslu á Árbæjarsafn og segir frá jólasveinunum á samfélagsmiðlum safnsins.

Landnámssýningin í Aðalstræti og Sjóminjasafnið á Grandanum eru opin alla daga frá 10-17 og Ljósmyndasafn Reykjavíkur er opið frá klukkan 12-17 alla virka daga og 13-16 á laugardögum. Á Ljósmyndasafninu má sjá sýninguna Fjarski og nánd, sem er unnin í samstarfi við Félag íslenskra samtímaljósmynda og gefur glögga mynd af samtímaljósmyndun á Íslandi síðustu tvo áratugi.

Nánari upplýsingar um sýninguna má finna hér.

https://borgarsogusafn.is/ljosmyndasafn-reykjavikur/syningar/fjarski-og-nand-islensk-samtimaljosmyndun

Aðalstræti 10, elsta hús borgarinnar sem nú heyrir undir Borgarsögusafn verður opið á völdum dögum á aðventunni en þar verður hægt að kaupa titla Sögufélagsins á góðu verði, fá áritanir hjá höfundum og fræðast um útgáfu ársins 2020. Í gluggum hússins má sjá fallegt og gamalt jólaskraut úr safneign.

Safnbúðir Borgarsögusafns í Árbæjarsafni, Landnámssýningunni, Ljósmyndasafninu og Sjóminjasafninu eru opnar á sama tíma og safnið. Þar má finna marga fallega og einstaka hluti sem tilvaldir eru í jólapakkann. Minnum á að menningarkortshafar fá 10% afslátt í safnbúðunum.